જામનગર અપડેટ્સ: ધ્રોલ_ જામનગર જિલ્લાના ધ્રોલ તાલુકામાં તસ્કરોએ ખાખીનો ખોફ ગુમાવ્યો હોય તેમ એક બાદ એક ચોરીના બનાવો સામે આવી રહ્યા છે. તાજેતરમાં જ હરીપર પીયાવા ચોકડી પાસે આવેલા સોલાર પ્લાન્ટને નિશાન બનાવી અજાણ્યા ચોર ઇસમો અંદાજે 12,000 મીટર કોપર વાયરની ચોરી કરી રફુચક્કર થઈ જતાં પંથકમાં ચકચાર મચી ગઈ છે.
રાત્રિના અંધકારનો લાભ લઈ તસ્કરોએ મચાવ્યો તરખાટ
પ્રાપ્ત વિગતો અનુસાર, ગત તા. 31/03/2026ની સાંજથી તા. 01/04/2026ની સવાર દરમિયાન ધ્રોલ પોલીસ મથકની હદમાં આવેલા થાણાથી 7 કિમી દૂર હરીપર પીયાવા ચોકડી પાસે આ બનાવ બન્યો હતો. રાજકોટના રહેવાસી ચંદ્રકાંતભાઈ ધરમશીભાઈ વાડોદરીયાના સોલાર પ્લાન્ટ વિસ્તારમાં તસ્કરો ત્રાટક્યા હતા. અંધારી રાતનો લાભ ઉઠાવી તસ્કરોએ પ્લાન્ટમાં ઘૂસીને સાક્ષી મોહનભાઈ ડાંગરીયાના પ્લાન્ટમાંથી 9000 મીટર (કિંમત ₹1.80 લાખ) અને કુણાલભાઈ ડાંગરીયાના પ્લાન્ટમાંથી 3000 મીટર (કિંમત ₹60 હજાર) મળી કુલ 2,40,000 રૂપિયાનો કોપર વાયર કાપી લઈ પલાયન થઈ ગયા હતા.
ધ્રોલ પોલીસે ગુનો નોંધી તસ્કરોનું પગેરું દબાવ્યું
ચોરીના આ બનાવ અંગે સોલાર પ્લાન્ટના સંચાલકોને સવારે જાણ થતા તુરંત પોલીસને જાણ કરવામાં આવી હતી. ફરિયાદી ચંદ્રકાંતભાઈની ફરિયાદના આધારે ધ્રોલ પોલીસે અજાણ્યા ચોર ઈસમો વિરુદ્ધ BNS કલમ 303(2) મુજબ ગુનો નોંધી તપાસના ચક્રો ગતિમાન કર્યા છે. આટલી મોટી માત્રામાં વાયરની ચોરીમાં કોઈ જાણભેદુ ટોળકી સામેલ હોવાની શક્યતાઓ પણ સેવાઈ રહી છે.
તપાસનો ધમધમાટ:
હાલ આ કેસની તપાસ પી.એસ.આઇ. એમ.એમ. કુંભારવાડીયા ચલાવી રહ્યા છે. પોલીસ દ્વારા આસપાસના સીસીટીવી ફૂટેજ અને શંકાસ્પદ હિલચાલ પર નજર રાખવામાં આવી રહી છે. પ્લાન્ટમાંથી લાખોના વાયરની ચોરી થતા અન્ય પ્લાન્ટ ધારકોમાં પણ ફફડાટ ફેલાયો છે. હવે જોવાનું એ રહે છે કે પોલીસ આ “વાયર ચોર” ટોળકીને ક્યારે જેલના સળિયા પાછળ ધકેલે છે.
