જામનગર અપડેટ્સ: જામનગરમાં હાપા ઓવરબ્રિજ ઉપર આજે સવારે કચરા ગાડી ના ચાલકે બારમા ધોરણના એક વિદ્યાર્થીને હડફેટમાં લઈ તેના બંને પગ ભાંગી નાખતાં ભારે ચકચાર જાગી છે. જે ને સારવાર માટે જી.જી. હોસ્પિટલમાં ખસેડાયો છે, અને તેની સધન સારવાર ચાલી રહી છે. જામનગર મહાનગરપાલિકા હસ્તકની કચરા ગાડી, કે જેના ચાલકો માતેલા સાંઢની જેમ શહેરમાં વાહનો ચલાવી રહ્યા છે. છેલ્લા એક સપ્તાહ દરમિયાન કચરા ગાડી ના કારણે હડફેટે આવી જવાનો આ ચોથો બનાવ બન્યો છે. હાપા વિસ્તારમાં રહેતો શિવ શૈલેષભાઈ રાઠોડ નામનો વિદ્યાર્થી, કે જે બારમા ધોરણમાં અભ્યાસ કરે છે, અને તાજેતરમાં તેણે બોર્ડની પરીક્ષા આપવાની છે. પરંતુ આજે પોતે અકસ્માગ્રસ્ત બન્યો છે, અને બંને પગમાં ફેક્ચર થઈ ગયા હોવાથી હોસ્પિટલના બીછાને સારવાર હેઠળ છે. તેના પરિવારને જાણ થતાં તેઓ તાત્કાલિક હોસ્પિટલમાં દોડી ગયા હતા, અને આ અકસ્માત સર્જનાર વાહન ચાલક સામે ફરિયાદ નોંધવા તજવીજ હાથ ધરવામાં આવી રહી છે. જાણવા મળતી માહિતી મુજબ આરોપી વાહન ચાલક પાસે આરટીઓ માન્ય લાયસન્સ નથી. જેની વિગતો પોલીસ તપાસ બાદ સામે આવશે
મહાનગરપાલિકાના તંત્રએ આવા બે ફામ ગતી એ વાહન ચલાવનાર વાહન ચાલકો સામે પણ કડક કાર્યવાહી કરવી જોઈએ, તેવી માંગ ઉઠી છે.અકસ્માત સમયે બનાવના સ્થળે પહોંચેલી ૧૦૮ ની ટુકડીએ કચરા ગાડીના ડ્રાઇવરને પોતાની સાથે બેસાડી લીધો હતો, અને ઇજાગ્રસ્તને સારવાર માટે મદદ કરવા જણાવ્યું હતું.જેની પાસે લાયસન્સ ન હોવાનું જણાવ્યું હતું. જે હોસ્પિટલ સુધી ભેગો આવ્યો હતો, પરંતુ મોબાઇલમાં વાતો કરતો એકાએક રફુચક્કર થઈ ગયો હોવાથી તેની ફરી શોધખોળ ચલાવાઇ રહી છે.
