જામનગર અપડેટ્સ, જામનગર: જામનગર શહેરમાં લોન અપાવવાના બહાને સામાન્ય મજૂરી કામ કરતા પરિવારના દસ્તાવેજો મેળવી, કર્ણાટકા બેંકમાં પેઢીઓના નામે બોગસ બેંક એકાઉન્ટ્સ ખોલાવી સાયબર ફ્રોડના આશરે ₹૧.૫૦ કરોડથી વધુ રકમની હેરાફેરી કરવાનું મોટું કૌભાંડ પ્રકાશમાં આવ્યું છે. આ મામલે ભોગ બનનાર યુવકની ફરિયાદના આધારે જામનગર સાયબર ક્રાઇમ પોલીસે બે શખ્સો તથા કર્ણાટકા બેંકના એક કર્મચારી વિરુદ્ધ ગંભીર કલમો હેઠળ ગુનો નોંધી સઘન તપાસના ચક્રો ગતિમાન કર્યા છે.
માધાપર ભુંગા વિસ્તારમાં રહેતા અને છૂટક મજૂરી કરી ગુજરાન ચલાવતા ૨૭ વર્ષીય અસલમ દાઉદભાઇ ભગાડે સાયબર ક્રાઇમ પોલીસ મથકે નોંધાવેલી ફરિયાદ મુજબ, આરોપીઓ અસગર અબ્દુલ ચમડીયા, ફૈજલ ખફી અને કર્ણાટકા બેંક (કુબેર એવેન્યુ બ્રાંચ, જામનગર)ના કર્મચારી રઘુભાઇએ ગુનાહિત કાવતરું રચ્યું હતું. આરોપીઓએ ફરિયાદીને લોન અપાવવાની લાલચ આપી ભરોસામાં લીધા હતા અને તેમની પાસેથી આધારકાર્ડ, પાનકાર્ડ સહિતના તમામ અસલ દસ્તાવેજો મેળવી લીધા હતા. આ ઉપરાંત વિવિધ ફોર્મ્સ પર સહીઓ કરાવી ફરિયાદીના નામે સિમકાર્ડ પણ મેળવી લીધા હતા.
ત્યારબાદ ફરિયાદી કે તેમના પરિવારની જાણ બહાર, બેંક કર્મચારીની કથિત મિલીભગતથી કર્ણાટકા બેંકમાં ત્રણ અલગ-અલગ ખાતાઓ ખોલાવવામાં આવ્યા હતા:
ફરિયાદીના દસ્તાવેજો પર “સ્ટાર મોબાઇલ”ના નામે કરંટ એકાઉન્ટ (નંબર: 0372202500002101)
ફરિયાદીના ભાઈ અકરમના નામે “સહારા મોબાઇલ”નું કરંટ એકાઉન્ટ (નંબર: 0372202500001901)
ફરિયાદીની ભાભીના નામે વધુ એક બેંક એકાઉન્ટ (નંબર: 9992505078266701)
આ તમામ એકાઉન્ટ્સનો ઉપયોગ સાયબર ગઠિયાઓએ પોતાના ફ્રોડના નાણાં સગેવગે કરવા માટે ‘મ્યુલ એકાઉન્ટ’ (Mule Accounts) તરીકે કર્યો હતો. આ ત્રણેય ખાતાઓમાં આશરે રૂ. ૧,૫૦,૯૮,૦૦૦/- (એક કરોડ પચાસ લાખ અઠ્ઠાણું હજાર) જેટલા જંગી સાયબર ફ્રોડના નાણાંના ટ્રાન્ઝેક્શન્સ કરવામાં આવ્યા હતા.
આ સમગ્ર કારસાનો પર્દાફાશ થતાં જામનગર સાયબર ક્રાઇમ પોલીસ સ્ટેશનમાં ભારતીય ન્યાય સંહિતા (BNS) ૨૦૨૩ની કલમ ૩૧૬(૨), ૬૧(૨) તેમજ ઇન્ફોર્મેશન ટેકનોલોજી (IT) એક્ટની કલમ ૬૬(સી) અને ૬૬(ડી) હેઠળ ગુનો દાખલ કરવામાં આવ્યો છે. સાયબર ક્રાઇમ પીઆઇ એન. બી. ડાભીના માર્ગદર્શન હેઠળ પોલીસે બેંક કર્મચારી સહિત તમામ સંડોવાયેલા આરોપીઓની ધરપકડ માટે ચક્રો ગતિમાન કર્યા છે.
