જામનગર અપડેટ્સ : શહેરના લાલબંગલા રોડ વિસ્તારમાં નવા એસટી બસ સ્ટેશન પાસે સરકારી વસાહતના ગેટ નજીક હિટ એન્ડ રન જેવી ઘટના સામે આવી છે. કાળા રંગના નંબર પ્લેટ વગરના એક્સેસ સ્કૂટરના ચાલકે એસટી બસને પાછળથી અથડાવી નુકસાન પહોંચાડ્યું હોવાની ફરિયાદ નોંધાઈ છે. પોલીસે નાશી ગયેલ એક્સેસ ચાલક સામે ફરિયાદ નોંધી આરટીઓ નંબરના આધારે શોધખોળ હાથ ધરી છે. મળતી માહિતી મુજબ, ઘટના ત્યારે બની હતી જ્યારે એસટી બસ (રજી. નં. GJ 18 ZT 1767) નવા એસટી બસ સ્ટેશન પાસેની લાલબંગલા રોડ પર પસાર થઈ રહી હતી. તે દરમિયાન સરકારી વસાહતના ગેટ નજીક કાળા રંગના એક્સેસ સ્કૂટર પર સવાર અજાણ્યા વ્યક્તિએ બેદરકારીપૂર્વક બસના પાછળના ભાગે જોરદાર ટક્કર મારી હતી. અકસ્માતના પગલે બસના પાછળના બંફર ભાગે અંદાજે રૂ. ૩,૦૦૦ જેટલું નુકસાન થયું હોવાનું પ્રાથમિક અંદાજ છે.
અકસમાત બાદ સ્કૂટરચાલક સ્થળ પરથી ફરાર થઈ ગયો હતો. મહત્વની બાબત એ છે કે સ્કૂટર પર આગળ-પાછળ કોઈ નંબર પ્લેટ ન હોવાનું જણાવાયું છે, જેના કારણે આરોપીની ઓળખ કરવામાં મુશ્કેલી ઉભી થઈ છે. ઘટનાની જાણ થતાં એસટી વિભાગના કર્મચારીએ પોલીસમાં સત્તાવાર ફરિયાદ નોંધાવી છે. પોલીસે ફરિયાદના આધારે વધુ તપાસ હાથ ધરી છે અને આસપાસના સીસીટીવી ફૂટેજની તપાસ શરૂ કરી છે.
ટ્રાફિક નિયમોનું ઉલ્લંઘન અને બેદરકારીપૂર્વક વાહન હંકારવાના કારણે આ પ્રકારની ઘટનાઓ બનતી હોવાની ચર્ચા પણ ચાલી રહી છે. પોલીસે વાહનચાલકોને ટ્રાફિક નિયમોનું પાલન કરવા અને નંબર પ્લેટ વગરના વાહનો ચલાવવાનું ટાળવા અનુરોધ કર્યો છે. શહેરમાં વધતા ટ્રાફિક અને બેદરકારીના બનાવોને પગલે નાગરિકોમાં પણ ચિંતા વ્યક્ત થઈ રહી છે. પોલીસે આરોપી સ્કૂટરચાલકને ઝડપી લેવા માટે કાર્યવાહી તેજ કરી હોવાનું જણાવ્યું છે
